चला भटकंतीला

sandykul07 on Tue May 15, 2012 9:54 pm

कुठं कुठं जायचं भटकायला हा उन्हाळी सुट्टीचा परवलीचा प्रश्न झालाय. बिझी शेडय़ुल आणि सुट्टीची मज्जा लुटताना करायच्या भटकंतीविषयीच्या या चार गोष्टी..

‘उन्हाळा' या उन्हाच्या काहिलीचा फील देणाऱ्या शब्दासोबत येते ती एक मस्त भलीमोठी लांबलचक सुट्टी ! एसीचा गारवा, आइस्क्रीमचा थंडावा आणि टीव्हीचा मनोरंजनवा कितीही गोड वाटला तरी आपल्याला भटकंतीही तेवढीच प्रिय असते. अलीकडं वीकएण्ड टुरिझमचं स्थान बळकट होत असलं तरीही शाळा-कॉलेजमधले विद्यार्थी आणि त्यांच्या पालकांसाठी ही उन्हाळी सुट्टी खूपशी सोयीची ठरते.

सुट्टीच्या सुरुवातीलाच असणारी व्यक्तिमत्त्व विकासाची शिबिरं वगरे आटोपली की वेळ येऊन ठेपते मज्जा करायाची ! त्यासाठी हवं मनमुराद भटकायला.. हे भटकणं बऱ्याचदा असतं आपल्या गावात. हे गावचं घर स्वत:चं असतं किंवा आजोळ वगरे. तेही नसेल तर अलीकडं रिसॉर्टस्, घरगुती राहण्याची सोय असते. गाव आपलंच असतं. मग गावभर भटकता येतं उगीचच. एकदम निरुद्देश.. भटकताना दिसतो रानमेवा. तो खायचा. नदीत पोहणं किंवा समुद्रावरच्या रेतीत किल्ले बांधणं-शंखिशपले गोळा करणं, बलगाडीची सर करणं हे करावं. आंबे-फणसांवर ताव मारायचा. विहिरीतल्या कासवाशी दोस्ती करायची. शेतातून हुंदडायचं. ऊन ऊन दुपारी झाडाखाली बसून भाकऱ्या चोपायच्या नि निवांत ताणून द्यायची.. यासारखं दुसरं सुख नाही.

गावाला जायला सवड नि आवड नसेल तर ढेरसाऱ्या ट्रॅव्हल कंपन्या तुमच्या दिमतीला आहेत. त्यातले आपल्या आवडीचे पर्याय शोधा नि बाहेर पडा.. हां, तेवढाही वेळ नसेल तर तुमच्या जवळपासची ठिकाणं बघा. उदाहरणार्थ- ठाण्याजवळची ओवळेकरवाडी किंवा सगुणाबाग. पुण्याजवळची मोराची चिंचोली आणि निघोजचे रांजणखळगे. कर्नाळा, दाजीपूर किंवा तुम्हाला जवळ असलेली अभयारण्यं. नळदुर्गासारखे भुईकोट किल्ले. समुद्राची ओढ असेल तर केळवा बीचला जा किंवा हरिहरेश्वर-दिवेआगार गाठा.

समजा चार दिवसांची सुट्टीही मिळाली नाही तरी नाराज होऊ नका. मग आपल्या शहरातल्याच वेगवेगळ्या ठिकाणांना भेट द्या. मुंबईत राहून घारापुरीच्या बेटावर न गेलेले अनेकजण असतील.

राणीचा बाग, नेहरू प्लॅनेटोरिअम-सायन्स सेंटर, तारापोरवाला मत्स्यालय, म्युझिअम, आर्ट गॅलरी बघायची राहून गेलेली असेल तर ती बघता येईल. असं बघणं नको असेल तर सरळ लाँग ड्राइव्हला जा. रस्ता नेईल तिकडं.. मे बी तो रस्ता वांद्रे-वरळी सीिलकला जाईल, जुहू चौपाटीवर जाईल किंवा मरीन ड्राइव्हला जाईल.. किंवा आणखी कुठंही.. तिथं जा आणि एकदम रिलॅक्स व्हा. कारण रिलॅक्स होणं हाच तर सुट्टीचा मूळ उद्देश असतो. तो तर साध्य व्हायलाच हवा ना..

भटकंतीच्या टिप्स
* प्रत्येकाच्या खिशात आपली माहिती देणारं कार्ड हवं.
* कमीतकमी बॅग्ज घ्या. सॅक घेतल्यास ती सोयीची ठरते.
* प्रवासाच्या कालावधीनुसार कपडे घ्या.
* अभयारण्यात जाणार असाल तर रंगीत कपडे घालू नका. आरडाओरडा करू नका. फक्त निसर्गाचा आनंद घ्या.
* भटकताना कॅप, पाण्याची बॉटल, कॅमेरा, फर्स्ट एड बॉक्स वगरे घ्या.
* मोठा प्रवास असल्यास डॉक्टरांकडून तपासणी करून घ्यावी.
* प्रसंगी विमा उतरून घ्यावा.
* एटीएम कार्ड, क्रेडिट कार्ड कायम जवळ असावं.
* तिकिट्स, व्हाऊचर्स वगरे महत्त्वाची कागदपत्रं बॅगमध्ये नीट न विसरता ठेवा.

राधिका कुंटे