नारळाचे पदार्थ

श्रावण महिन्यात ओल्या नारळाची कमतरता नसते. संपूर्ण कोकणासह महाराष्ट्रीयन मंडळी ओल्या नारळापासून काही ना काही पदार्थ बनवित असतातच. महान्यूजच्या वाचकांसाठी आज ओल्या नारळाची करंजी आणि रवा नारळ लाडू कशा प्रकारे बनविले जाते, हे पाहूया!

ओल्या नारळाजी करंजी

पारीसाठी : १ कप बारीक रवा, १ कप मैदा, मुटका वळेपर्यंत तुपाचं मोहन, निरस दूध व पाणी घालून भिजत ठेवा. पीठ भिजवून अर्धा तास ठेवा. चटणी ग्राईंडरमध्ये थोडं थोडं पीठ घालून मऊ करुन घ्या.

सारणासाठी : एक मोठे नारळ, १ कप साईसकट दूध, दीड ते दोन कप साखर. सर्व एकत्र शिजवून घ्या. घट्ट झाल्यावर वाटल्यास मिक्सरमधून काढा, म्हणजे सारण एकसारखं मोकळं होईल. वेलीदोडे, जायफळपूड, चारोळी इत्यादी घाला. पुर्‍या लाटून घ्या. सारण भरून कड दुधाने चिकटवा. मंद गॅसवर तळा.

रवा-नारळ लाडू

साहित्य : अर्धा किलो बारीक रवा, दीड वाटी नारळाचा चव, पाऊण किलो साखर, पाव किलो साजूक तूप, चारोळी इ.

कृती : कढईत थोडं तूप गरम करुन घ्या. रव्यावर घालून नीट लावून मग उरलेलं तूप गरम करून, त्यात रवा छान भाजून घ्या. रवा भाजला गेला, की हाताला हलका लागतो. साखरेच्या निम्मं पाणी घालून पाक करा. पाक एक तारीहून जरा जास्त ठेवा. पाकात रवा, नारळ मिश्रण घातल्यावर सारखं हलवत राहा. सुरवातीला मिश्रण सैलसर दिसलं पाहिजे म्हणजे २-३ तासांनी ते व्यवस्थित होतं. गार झाल्यावर चारोळी इत्यादी घालून लाडू वळा. या लाडवांचा रंग बदामी येतो.

टीप : फार कमी नारळ घातल्यास लाडू चांगले लागत नाहीत.

तर मग काय? एखाद्या दिवशी वरील पदार्थ बनविण्यास हरकत नसावी.