फुलगोबीची खीर

रविवारचा दिवस हा नवनवीन खाद्यपदार्थांच्या आस्वादांचा दिवस असतो. सहा दिवस ऑफिसमध्ये काम केल्यानंतर सातवा दिवस रिलॅक्स म्हणून किचनमधील नवनवीन प्रयोग करण्यात निघून जातो.

कॅलरिज, फॅट, डाएट, न्युट्रेशन अशा भल्या भल्या शब्दांच्या पाठीमागे रोज धावताना एखादा दिवस जरा हटके खाण्यापिण्याची सारी बंधने झुगारणारा असा असतो. नुकताच फियानच्या अवेळी पावसामुळे बाजारात भाजी काही प्रमाणात स्वस्त झाली होती. दहा रुपये पाव असलेली फुलगोबी अचानक पाच रुपयांने मिळाली. स्वस्त मिळतेयं म्हणून अधिक घेण्याचा हव्यास मोडता आला नाही. फुलगोबीची सुकी भाजी खाण्यापेक्षा वेगळं काही करता येईल का याचा विचार सुरू झाला. मुलीने दिलेल्या गोड खिरीच्या फर्माईशवर विचार करताना कुठल्यातरी पुस्तकात फुलगोबीची खिर वाचल्याचं आठवलं आणि प्रिपरेशन सुरू झालं. ही खिर पुढील प्रमाणे करता येईल.

साहित्य :- फुलगोबीचा किस, दूध एक लीटर, केवडा इसेंन्स, साखर दोन वाट्या, काजू, वेलची पावडर

कृती :- प्रथम दूध उकळवायला ठेवावे, दूधाला उकळी येत असताना त्यात फुलगोबीचा किस टाकावा. हे दूध जवळजवळ अर्धे आटल्यावर त्यात साखर घालून पुन्हा आटवून घ्यावे. हे सर्व मिश्रण अर्धअधिक आटवून झाल्यानंतर थंड होण्यासाठी खाली उतरवून ठेवावे. थंड झाल्यावर त्यात वेलची, काजूचे तुकडे आणि केवडा इसेंन्सचे ५ थेंब टाकावेत. थंड झाल्यावर ही खीर सर्व्ह करावी.

खिरीचे अनेक प्रकार आहेत. माझी आजी तांदळाची खिर उत्तम करायची. इतर पदार्थांपेक्षाही ही खिर खाण्यात खूप मजा यायची. आजही काही हॉटेल्स असे आहेत की, ती खिरीसाठी प्रसिद्ध आहेत. चांदवड घाट ओलांडल्यानंतर मालेगावकडे जाताना डाव्या हाताला एक छोटासा ढाबा आहे. या ढाब्यावर उत्तम प्रतिची खिर मिळते. गमंत म्हणजे रात्री बेरात्री कितीही वाजता गेल्यानंतर गरम खिर मिळते. पारोळ्याला एसटी स्टँडच्या जवळच एक भोजनालय आहे. तेथेही खिर आवर्जून खाणार्‍यांची संख्या मुंबई -नागपूर महामार्गावर खूप मोठी आहे. अर्थात तेथे जाऊन खाण्यापेक्षा आज दिलेली खिर कधीतरी करून बघायला हरकत नाही.